நவீனத்தில் சுழலும் வாழ்க்கை
பொண்டாட்டி உண்டு
வைப்பாட்டிகளும் உண்டு
காசு கொடுத்துப் போவதுமுண்டு
அதையும் தாண்டி
பாலியல் குற்றச்சாட்டுகளும்
உண்டு
*
கூந்தலைப் பின்னிப்
போட்டுக் கொள்கிறவன்
நவீன இளைஞன்
*
மெசேஜ் எல்லாம்
Read More(மோர்)… இல் முடிகிறதே
காப்பி டீயில் முடியாதோ
*
வாங்குகிற சம்பளத்துக்குத்
தகுந்தாற் போல விலை வையுங்கள்
என்று
சொல்ல முடியுமா
வாங்குவோர்தான் வாங்காமல்
சட்ட மறுப்போ
சத்தியாகிரகமோ பண்ணிக் கொள்ள
வேண்டும்
*
பணத்தைக் கொடுத்து ஓட்டை
வாங்கு
முடியாவிட்டால்
எம்.எல்.ஏ.வை வாங்கு
அதுவும் முடியாவிட்டால்
கான்ட்ராக்டை வாங்கு
அதுவும் முடியாவிட்டால்
மக்களைத் திரட்டி மாபெரும்
போராட்டம்
*
கேலரி முழுவதும்
சீரணமாகாத
போட்டோக்கள் வீடியோக்கள்
இன்டர்னெல் ஸ்டோரோஜ் முழுக்க
வெந்தும் வேகாத
பி.டி.எப்.கள் இபப்கள்
வாய்ஸ்நோட்கள்
ஸ்டிக்கர்கள்
புல் டேட்டா பிளானிங்
அளவுக்கு அதிகமாகச் சாப்பிட்டு
விடுகிறது
வயிறு புடைக்க ஏப்பம் விட
முடியாமல் தவிக்கிறது
*
நாய்களுக்கு
வாயில் நுழைகிற பெயர்கள்
குழந்தைகளுக்கு
வாயில் நுழையாத பெயர்கள்
*****
No comments:
Post a Comment