நம்பிக்கையின் உணவு கனவு

நம்பிக்கையின் உணவு கனவு

பகல் கனவு பலிக்காது என்பார்கள்

அதிகாலை கனவு பலிக்கும் என்பார்கள்

கல்வியில் மாற்றத்தை உருவாக்க நினைத்த ஜுஜூபாய் பதேக்கா

என்ற ஆசிரியர் எழுதிய புத்தகத்தின் தலைப்பு பகல் கனவு என்பது

இன்றைய கல்வி முறையில் ஏற்பட்டுள்ள மாற்றங்களைப் பார்க்கும் போது

அவருடைய பகல் கனவு பலித்திருக்கிறதுதான்

அப்துல் கலாம் சொல்வார்

உறக்கத்தில் காண்பதல்ல கனவு

எது உன்னை உறங்க விடாமல் செய்கிறதோ அதுவே கனவு என்று

உறங்காமல் கனவு கண்ட அந்த விஞ்ஞானியின்

எழுச்சி பாரதமும் இன்று உருவாகி இருக்கிறதுதான்

ஹெலன் ஹெல்லர் சொல்வார்

தினம் தினம் கனவு காணுங்கள்

கனவு காண்பதை ஒருபோதும் நிறுத்தாதீர்கள் என்று

விடாமல் கனவு கண்ட அந்த பெருமாட்டியின் சாதனைகள்

இன்று உலகில் உள்ள பெண்களுக்கு மட்டுமல்லாது

அனைவருக்கும் வழிகாட்டிக் கொண்டிருக்கிறதுதான்

பிராய்டு சொல்வார்

அடக்கி வைக்கப்பட்ட உணர்வுகளின் வெளிப்பாடு கனவு என்று

கனவுகளுக்குப் புது வெளிச்சம் பாய்ச்சிய அந்த அறிஞரின்

கனவு குறித்த ஆய்வுகள் எத்தனையோ மனவியல் பிரச்சனைகளுக்குத்

தீர்வுகளைச் சொல்லியிருக்கிறதுதான்

பாரதி சொல்வார்

கனவு மெய்ப்பட வேண்டும் என்று

பாரதியின் காலத்தில் அவரது கனவுகள் மெய்ப்படாமல் போனாலும்

இன்று அவரது கனவுகள் ஒவ்வொரு மெய்ப்பட்டுக் கொண்டு இருக்கிறதுதான்

மார்ட்டின் லூதர் கிங் ஜூனியர் சொல்வார்

எனக்கு ஒரு கனவு இருக்கிறது என்று

அவரின் சமத்துவக் கனவை நோக்கித்தான் இன்று உலகமே போய்க் கொண்டிருக்கிறது

சீன புனைவு இலக்கியத்தின் உச்சம் என்று சொல்லப்படும்

ஒரு நாவலின் பெயர் சிவப்பு அறை கனவு என்பது

வாழ்விலக்கியத்தில் மட்டுமல்லாது புனைவிலக்கியத்திலும்

கனவு நிகழ்த்தும் அசாத்தியங்கள் அதிகம்தான்

அறிஞர் அண்ணா பற்றிய ஒரு புத்தகத்தின் தலைப்பு

மாபெரும் தமிழ்க்கனவு என்பது

அந்த மாபெரும் தமிழ்க்கனவே

ஒரு மாநிலத்தின் பெயரை நாடு என்று அமையும் வகையில்

தமிழ்நாடு என்று ஆக்கியிருக்கிறது

பென்னட் சொல்வார்

கனவுகள் இல்லாமல் யாரும் மகத்துவத்தை அடைந்ததில்லை என்று

மகத்துவமான மனிதர்கள் அனைவருக்கும்

மகத்துவமான கனவுகள் இருந்திருக்கின்றனதான்

கனவு வருவதற்கான தூக்கத்தைப் பற்றி நீட்ஷே சொல்வார்

தூங்குவது என்பது சாதாரண கலை அல்ல

அதற்காக நாள் முழுவதும் விழித்திருக்க வேண்டும் என்று

நாள் முழுவதும் விழித்திருந்து நற்காரியங்களை நிகழ்த்துபவர்களுக்குத்தான்

நல்ல தூக்கம் கிடைக்கிறது

நல்ல தூக்கத்தில்தான் நல்ல கனவுகள் உண்டாகின்றன

உலகை உன்னதமாக மாற்றும் யோசனைகள் பிறக்கின்றன

கனவுகள் வெறும் கனவுகள் மட்டுமல்ல

உன்னதப் பசிக்கான உணவுகள்

உறுதியை வளர்ப்பதற்கான தினவுகள்

ஆம் கனவுகள் வெறும் கனவுகள் மட்டுமல்ல

நன்மையை நோக்கி நகர்த்தும் நம்பிக்கைக்கான விளைவுகள்

அவை வாழ்க்கைக்கான திசைகாட்டிகள்

இருண்மையைக் கடப்பதற்கான ஒளி விளக்குகள்

பிறவிப் பெருங்கடலைக் கடப்பதற்கான கலங்கரை விளக்கங்கள்

இறந்து போனவர்கள் கனவில் வந்தால் சுபம் என்பார்கள்

என்னைக் கேட்டால் ஆக்கப்பூர்வமான கனவு உங்களுக்கு வந்தால்

எல்லாம் சுபம் சுபம்தான்

கனவு காணுங்கள்

கனிவைப் பேணுங்கள்

புது உலகைக் காணுங்கள்

புதுமையைப் பேணுங்கள்

அதற்கான கனவுகளை எப்போதும் காணுங்கள்

*****