முடிவில்லா வார்ப்பு சுழற்சி

முடிவில்லா வார்ப்பு சுழற்சி

யார் வீட்டு நாய் அந்தக் கருப்பு நாய்

பின்முதுகில் பொட்டென்று போடொன்று போட்டது

வழிபோக்கர் ஒருவருடன் பேசிக் கொண்டு போனதில்

பின்னால் வரும் நாயை முன்னால் இருக்கும் கண்கள்

கவனிக்கவில்லை என்று சொல்வதா

கண்கள் முன்னால் இருப்பதால் பின்னால் வருவதைக்

கவனிக்கவில்லை என்று சொல்வதா

சாலையில் இப்படியா கவனமில்லாமல் போவதென்று

காலில் கொஞ்சம் பிராண்டலையும்

செய்து வைத்தது என்று சொல்வதா

இப்படியா ஒரு வீட்டுநாய் செய்யும்

தெருவில் போவோர் வருவோரைப் பார்த்து குரைக்க

கை காலை லாவ

வேடிக்கைப் பார்த்தபடி பால்கனியில் அமர்ந்திருப்பது

நாய் வளர்ப்போர் பண்ணும் உபகாரம் என்பதா

மாடி வீட்டுக்காரரின் நாய் யாரைப் பார்த்தாலும் துரத்தும்

அவர் வீட்டு ஆசாமிகளைத் தவிர கடித்தும் வைக்கும்

மாடி வீட்டுக்காரரின் நாய் ஒரு நாள்

கருவக்காட்டில் உயிரற்றுத் தொங்கிக் கொண்டிருந்து

நாட்டாமைக்காரர் வீட்டு நாய்

விஷத்தைத் தின்று மரித்திருந்தது

என்னைப் பிராண்டிய நாய்க்கும்

இன்னம் சில நாட்களில் இப்படி ஏதேனும் நடக்கலாம்

வீட்டுக்காரர் இன்னொரு நாய் வளர்க்க தயாராகலாம்

வீட்டு நாய்கள் மனித நாய்கள் உட்பட

எஜமான விசுவாசத்தை எப்படியும் காட்டும்

வாழ்க்கை சுழற்சிக்கு முடிவேது

*****