சம்சாரியின் சகல பரிபாத்தியங்கள்

சம்சாரியின் சகல பரிபாத்தியங்கள்

கன்னத்தில் போட்டுக் கொள்

விபூதி பூசிக் கொள்

நாமத்தை இட்டுக் கொள்

நூலைக் கழற்றி விடாதே

தீட்டானால் விலகி இரு

உச்சாடனம் செய்யாது உள்ளே விடாதே

அடக்க முடியாத போது

பரிகாரம் பண்ணிக் கொள்

வீட்டோடு இருப்பவருக்கு

வீட்டில் இருப்பவையோடு

ஆயிரத்தெட்டு உண்டு

மீறவும் முடியாது

மீறாமலும் முடியாது

சந்தர்ப்பங்களைச் சமாளித்துக் கொண்டு

சடங்குகளைத் தொடர வேண்டும்

அடையாளங்கள் அழியாமல்

அச்சு அசலாய் வாழ வேண்டும்

நகலெடுத்த பிரதியில் மாற்றங்களும் கூடாது

எப்போது வேண்டுமானாலும்

எதுவும் உதிரலாம்

உதிர்வதற்கு முன் உதிர்த்தல் ஆகாது

உதிரும் காலம் வரும் வரை

உதிர்க்காமல் சுமப்பதில் நிற்கிறார் சம்சாரி

*****