கடவுள் சகித்துக் கொள்வார் மற்றும் தேவதைகள் முத்தமிடும் பொழுதுகள்

கடவுள் சகித்துக் கொள்வார் மற்றும் தேவதைகள் முத்தமிடும் பொழுதுகள்

கடவுளை வழிபடுவதைப் பார்த்து

சாத்தானுக்குக் கோபமிருக்காதா

தேவதைகளைக் கொண்டாடுவதைப் பார்த்து

பிசாசுகளுக்கு வருத்தமிருக்காதா

சாத்தானைக் கேட்டால்

கோயிலுக்குள் இடமில்லாத எனக்கு

மனதுக்குள் இடம் கொடுத்திருக்கிறீர்களே

அது போதாதா என்கிறது

பிசாசைக் கேட்டால்

தேவதைகளைக் கொண்டாடி விட்டு

பொறாமையிலும் வஞ்சகத்திலும்

என்னைத் தழுவிக் கொள்கிறீர்களே

அதை விட வேறென்ன வேண்டும் என்கிறது

மனிதர்கள் யாரையும் கைவிடவில்லை எனும் போது

இப்போது

கடவுளுக்கும் கொஞ்சம் சந்தோசம்

தேவதைகளுக்கும் கொஞ்சம் ஆறுதல்

அப்போது

சாத்தான்களைச் சுமந்து

கோயிலுக்கு வரும் நெஞ்சங்களை

கடவுளால் தாங்கிக் கொள்ளவும் முடிகிறது

பிசாசுகளைத் தழுவி வரும் கரங்களை

தேவதைகளால் முத்தமிடவும் முடிகிறது

மற்றும் அப்போது

சாத்தான்களின் கோபம் தணிகின்றன

பிசாசுகளின் வருத்தங்கள் தீர்கின்றன

*****