பொன்னியம்மன் பார்த்துக் கொள்வாள்

பொன்னியம்மன் பார்த்துக் கொள்வாள்

பத்து பைசா இல்லாமல் போனாலும்

பொன்னியம்மன் பார்த்துக் கொள்வாள்

கை நிறைய பூக்களோடு போனாலும்

பொன்னியம்மன் பார்த்துக் கொள்வாள்

பை நிறைய உபயங்களோடு போனாலும்

பொன்னியம்மன் பார்த்துக் கொள்வாள்

பத்து பேர் பசியாற்றி விட்டுப் போனாலும்

பொன்னியம்மன் பார்த்துக் கொள்வாள்

ஓர் உயிரை எடுத்து விட்டுப் போனாலும்

பொன்னியம்மன் பார்த்துக் கொள்வாள்

பொட்டிட்டு மஞ்சள் ஆடை சகிதம் போனாலும்

பொன்னியம்மன் பார்த்துக் கொள்வாள்

குடித்து விட்டு தள்ளாடிக் கொண்டு போனாலும்

பொன்னியம்மன் பார்த்துக் கொள்வாள்

எப்போதும் எங்கேயும் எல்லாவற்றையும்

பொன்னியம்மன் பார்த்துக் கொள்வாள்

ஆலயக் காசை ஆட்டையைப் போட்ட

அந்தியூரானை வாதம் பிடித்து இழுக்க

அவனைக் கட்டியவளைத் தீர்க்க சுமங்கலியாய்

பொன்னியம்மன் பார்த்துக் கொள்வாள்

ஆலயத் திருப்பணியில் மயங்கி விழுந்து உயிர் பிரிந்த

ஐயனாரப்பன் மகள் மூளியாய் ஊர் திரும்ப

பொன்னியம்மன் பார்த்துக் கொள்வாள்

எல்லாவற்றையும் பொன்னியம்மன் பார்த்துக் கொள்வாள் என்று

பொன்னியம்மனைப் பார்த்துக் கொண்டு வாழ்வது ஐதீகம்

*****