மாறத் தொடங்கும் விளையாட்டுகள்

மாறத் தொடங்கும் விளையாட்டுகள்

தடுத்து விட்டதாக நினைப்பவர்கள்

அப்படியே நினைத்துக் கொள்கிறார்கள்

உபயோகப்படுத்துபவர்கள்

உபயோகப்படுத்திக் கொண்டு இருக்கிறார்கள்

தடுப்பதற்குச் சிலரும்

தடுப்பை உடைப்பதற்குச் சிலரும்

எப்போதும் முயன்று கொண்டே இருக்கிறார்கள்

தடுப்பவர்கள் ஒழுக்கத்தை உயர்த்திப் பிடிக்கிறார்கள்

உடைப்பவர்கள் சுதந்திரத்தை உயர்த்திப் பிடிக்கிறார்கள்

தடுப்பவர்களின் வீட்டுக் கழிவறைகள்

சுய மைதுனத்தில் பிறந்த குழந்தைகளைப் பிரசவிக்கின்றன

உடைப்பவர்களின் வீட்டிற்குள் இருந்து

அடிமைகள் ரகசியமாக எட்டிப் பார்க்கிறார்கள்

எது குறித்தும் எந்தக் கவலையுமின்றி

தெருவில் குழந்தைகள்

திருடன் போலீஸ் விளையாட்டை விளையாடிக் கொண்டிருக்கிறார்கள்

இந்த முறை

தடுப்பவர் உடைப்பவர் விளையாட்டை விளையாடிக் கொண்டிருங்கள்

என்று கூறிச் செல்கிறேன்

குழந்தைகள் ஒருவரை ஒருவர் அடித்துக் கொள்ள ஆரம்பிக்கிறார்கள்

*****