மரணத்தின் பாவக் கணக்கு
ஒட்டுவதற்கு இடம் கிடைத்த
சந்தோசத்தில்
கண்ணீர் அஞ்சலி போஸ்டரை ஒட்டி
விட்டுப் போகிறார்கள்
இல்லாத நேரத்தில் எவன் ஒட்டிப்
போனானோ என்று
வீட்டுக்காரி ஒட்டியவர்களைச்
சபிக்கத் தொடங்குகிறாள்
பாடையில் படுத்துக் கிடப்பவர்
செத்துப் போனதற்காக நொந்து
கொள்கிறார்
தன்னை விசாரிக்கும் சித்திரகுப்தனிடம்
அந்தப் போஸ்டரைக் கிழித்து
விட்டுத் திரும்ப
அனுமதி கேட்டுப் பார்க்கிறார்
அனுமதி மறுக்கும் சித்திரகுப்தன்
மரணத்தின் பாவக் கணக்கில்
இதுவும் அடக்கம் என்கிறார்
கொஞ்சம் கூட கருணை இல்லாமல்
*****
No comments:
Post a Comment