பிள்ளைகள் தொலைந்த திரைவெளி

பிள்ளைகள் தொலைந்த திரைவெளி

இப்போதுள்ள ஆசிரியர்கள்

என்னமாய்ப் பாட்டு பாடுகிறார்கள்

எல்லா புதுபட மெட்டுகளிலும்

பாடங்களைப் பாட்டாய்ப் பாடுகிறார்கள்

புலியூர் சரோஜா போல பிரபுதேவா போல

என்னமாய் நடனம் ஆடுகிறார்கள்

சிவாஜி போல ரஜினி போல கமல் போல

என்னமாய் நடித்துக் காட்டுகிறார்கள்

பிள்ளைகள் பேஸ்புக் நினைப்பிலும்

மீம்ஸ் நினைப்பிலும் உட்கார்ந்திருக்கிறார்கள்

ஆசிரியர்கள் இப்போது

மீம்ஸ் கன்டென்டுகளுடன் பாடம் நடத்தத் தொடங்குகிறார்கள்

பிள்ளைகள் இன்ஸ்டாகிராம் கனவில் மூழ்குகிறார்கள்

ஆசிரியர்கள் இன்ஸ்டாகிராமில் கணக்குகள் தொடங்குகிறார்கள்

பிள்ளைகள் மொபைல் கேமிற்குள் எட்டிப் பார்க்க

ஆசிரியர்களும் கேமிற்குள் நுழைகிறார்கள்

பிள்ளைகள் ஆப்பிற்குள் ஒளிய துவங்கும் போது

கண்களைக் கட்டிக் கொண்டு

ஆசிரியர்களும் ஆப்பிற்குள் நுழைந்து

பிள்ளைகளைத் தேடத் தொடங்குகிறார்கள்

பிள்ளைகள் குறித்த கனவுகளோடு

பெற்றோர்கள் உறங்கிக் கொண்டிருக்க

இணையதளங்கள் ரம்மிகளையும் குட்காக்களையும்

நிர்வாண உலகங்களையும் அள்ளி வீசிக் கொண்டிருக்கின்றன

பிள்ளைகள் தொலைந்த திரைவெளியில்

ஆசிரியர்கள் இன்னும் குழந்தைகளைத் தேடிக் கொண்டிருக்கிறார்கள்

*****