மேற்கூரையின் பிரபஞ்சம்

மேற்கூரையின் பிரபஞ்சம்

பால்கனியில் அமர்ந்து

பேருந்துகளின் மேல்பக்கத்தைப் பார்ப்பது

பார்க்கக் கூடாது என்பதற்காகப் படைக்கப்பட்டிருக்கின்ற

முதுகைப் பார்ப்பது போன்ற அனுபவம்

ஒவ்வொரு முதுகிலும் இருக்கும்

வெவ்வேறு அழுக்கைப் போன்றதுதான்

ஒவ்வொரு பேருந்தின் மேற்புறமும்

அதற்குள் ஒரு ஓட்டுநர் ஒரு நடத்துநர் பல பயணியர் இருக்கின்றனர்

முதுகுக்குள் மட்டும் ஏது குறைச்சல்

தண்டுவடம் நுரையீரல் இதயம்

முக்கியமாக வயிறு

மார்பைப் பார்க்கச் சொல்லி பழக்கப்படுத்தியவர்கள்

முதுகைப் பார்ப்பது மூதேவியைப் பார்ப்பதாய்ச் சொல்லியிருக்கிறார்கள்

கூரையில் என்ன இருக்கிறது என்று

வீட்டில் இருப்பவர்கள் இருப்பது போல இருந்து விட முடியுமா

கூரையின் மேல் வந்து அமர்ந்திருக்கும் குருவிக்கு

கூரையில் கொட்டிக் கிடக்கும் உலகை

பார்த்துக் கொண்டே இருக்கலாம்

பேருந்தின் மேற்கூரையில் ஒட்டிக் கிடக்கும் பிரபஞ்சத்தைப் போல

*****