இருந்தவரும் இறந்தவரும்
நேற்று நன்றாக இருந்தவர்
இன்று சாகலாம்
இன்று நன்றாக இருந்தவர்
நாளை சாகலாம்
நாளை நன்றாக இருந்தவர்
அதற்கு அடுத்த நாள் சாகலாம்
அதற்கு அடுத்த நாள் நன்றாக
இருந்தவர்
அதற்கும் அடுத்த நாள் சாகலாம்
இப்படித்தான்
ஒரு நாள் நன்றாக இருந்தவர்
ஒரு நாள் சாகலாம்
நாள் கணக்கை எடுத்து விட்டால்
நன்றாக இருந்தவர்
சாகலாம்
நன்றையும் எடுத்து விட்டால்
இருந்தவர்
சாகலாம்
இருப்பையும் எடுத்து விட்டால்
சாகலாம்
சாவையும் எடுத்து விட்டால்
வேறென்ன இருக்கிறது வாழ்க்கையில்
*****
காணாமல் போன சிட்டுக்குருவி
காக்கை குருவி எங்கள் ஜாதி
அரிசியை அள்ளிப் போட்ட பின்தான்
பாரதி கவனித்தார்
சிட்டுக்குருவியைக் காணவில்லை
*****
விஷேச அனுமதிகள்
இரு சக்கர வாகனத்தில்
இருவருக்கு மட்டும் அனுமதி
ஆறு சக்கர பேருந்தில்
அறுபது வரைக்கும் அனுமதி
அரசுப் பேருந்துகளில்
எண்பது நூற்று இருபது வரை
அனுமதி
தனியார்ப் பேருந்துகளில்
நூற்று ஐம்பது நூற்று எண்பது
வரை அனுமதி
தடுத்து நிறுத்தப் படுவது
என்னவோ
மூவர் செல்லும் இரு சக்கர
வாகனம்
*****
No comments:
Post a Comment