மாஸ்டர் ஒரு கப் ஆசுவாசம்

விஷேச மனநிலையாளர்கள்

ஒரு விஷேசமான மனநிலை வேண்டும் என்று

வந்தவரிடம்

பேசாமல் போய் படுத்துத் தூங்குங்கள் என்றேன்

ஆம் ஆம் ஆம்

அதுதான் வேண்டும் என்று

அடம் பிடித்து அழத் தொடங்க ஆரம்பித்து விட்டார் அவர்

எனக்கொரு விஷேசமான மனநிலை கிடைத்தது போல இருக்க

அன்றிரவு முழுவதும் உறங்க முடியாமல் அழுதேன்

மறுநாள் விடியலில்

அந்த மனிதரிடம் சென்று மன்றாடினேன்

என் விஷேசமான மனநிலையைக் கொடுத்து விடுங்கள் என்று

அன்றிரவு நிம்மதியாக உறங்கியதாகச் சொன்னவர்

கொடுக்க இயலாமைக்கு வருத்தம் தெரிவிப்பதாகச் சொன்னார்

வருத்தங்களை நன்றியோடு பெற்றுக் கொண்டு

உறக்கம் வராத சாலைகளில்

இரவு முழுவதும் நடந்து கொண்டிருக்கும் நான்

எனக்கொரு விஷேசமான மனநிலை வேண்டும் என்று

சத்தமிட்டுக் கொண்டே செல்கிறேன்

சாலையின் இரு மருங்கிலும் உறங்கிக் கொண்டிருக்கும்

யாருக்கும் என் குரல் கேட்பதாகத் தெரியவில்லை

குரல் கேட்டு விழித்தெழும் யாரோ ஒருவர்தான்

எனக்கான உறக்கத்தைத் தர வேண்டும்

விழிப்பதற்கு தயாராக யாரும் இல்லாத உலகில்

*****

கால பேதம்

கோழிகளுக்கு அதன் குஞ்சுகள்

எவ்வளவு பிடித்திருக்கிறது

அதுவே கொத்தி விரட்டி விடும் காலம் வரும் வரை

*****

மாஸ்டர் ஒரு கப் ஆசுவாசம்

மாஸ்டர் ஒரு டீ

எனச் சொல்லும் போது வரும் ஆசுவாசம்

அரை பிளேட் மட்டன் பிரியாணி

ஒரு சிக்கன் கிரேவி எனச் சொல்லும் போது

எங்கே தொலைந்து போகுமோ

ஆகவே முடிவில்

பிரியாணி ஆகி விட்ட ஆட்டுக்கும்

கிரேவியாகி விட்ட கோழிக்கும்

ஆசுவாசம் இழந்து விட்ட எனக்கும்

மாஸ்டர் ஒரு கப் டீ

*****