வேக அப்பியாசங்கள்
வேகத்திற்கென வாகனங்கள் உருவாக்கப்படுகின்றன
வேகமாகச் செல்பவர்கள் வேகமாகவும்
மெதுவாகச் செல்பவர்கள் மெதுவாகவும்
வாகனங்களைச் செலுத்திக் கொண்டிருக்கிறார்கள்
அவசர கால ஊர்திகளும்
அளவான வேகத்தில் செல்கின்றன
இறுதி ஊர்வல வாகனங்கள்
எப்போதும் மெதுவாகச் செல்கின்றன
வேகமாகச் சென்று மரணித்தவரின்
தவறைச் சுட்டிக் காட்டுவதைப்
போல
*****
புத்தாண்டுக் குழப்பம்
புத்தாண்டும் பொங்கலும்
எத்தனைப் பேரை வாழ்த்து சொல்ல
வைக்கிறது
வாழ்த்துகள் வந்து கொண்டே
இருக்கின்றன
ஒரு காப்பு – பேஸ்ட்டில்
எல்லாம் சுபமாக முடிந்து
விடுகின்றன
பதில் வாழ்த்து சொல்ல
எந்தக் காப்பி – பேஸ்ட்டைத்
தேர்ந்தெடுப்பது என்பதில்தான்
குழப்பம் ஆரம்பிக்கிறது
*****
எப்போதிருக்கும் மரங்கள் நடப்பட்டவை அல்ல
ஆங்காங்கே நடப்பட்ட மரக்கன்றுகள்
தண்ணீருக்காக ஏங்குகின்றன
மேய வரும் ஆடுகளை
மருட்சியோடு பார்க்கின்றன
ஒவ்வோராண்டும் அதே இடத்தில்
ஒவ்வொரு முறை நடப்படும் யாவும்
மாறாத அனுபவத்தைச் சந்தித்து
மற்றுமொரு மரக்கன்றுக்கு
வழிவிட்டு
வேறு வழியின்றி மாண்டு போகின்றன
இருக்கின்ற மரங்களில் பல
நாம் நடாமல் வளர்ந்ததுதான்
என்பதை
இப்போதில்லை என்றாலும்
எப்போதாவது நம்புங்கள்
*****
No comments:
Post a Comment