தீவிரத்தை நோக்கி நகரும் சராசரிகள்

தீவிரத்தை நோக்கி நகரும் சராசரிகள்

போ

போய் வேலையைப் பார்

என்று சொல்லும் போது

எப்படிச் சொல்வது

நேற்று வரை தீவிர சிகிச்சைப் பிரிவில் இருந்ததை

நடப்பதெல்லாம் ஒரு நொடியில் நிகழ்ந்து விடுகிறது

விளக்கங்களுக்கு மணி கணக்கில் நேரம் தேவைப்படுகிறது

சராசரிகள் ஒரு நாளில் தீவிரத்தை நோக்கி

நகரத்தான் வேண்டியிருக்கிறது

நிஜமான தீவிர சிகிச்சைப் பிரிவு என்பது

நடைமுறையில் வேறு என்பது

உட்கார நாற்காலி இருந்தும்

நின்று கொண்டே இருக்கும்

அவஸ்தையில் உழல்பவர்களுக்கே புரியும்

*****

எல்லாருக்கும் ஒருவர்

இந்த அறைக் காற்றை

ஆயிரத்து எட்டாவது முறையாகச்

சுவாசித்துக் கொண்டிருக்கிறேன்

வாடகை எதுவும் செலுத்தாமல்

சிறுநீர் மலம் காற்றாடி விசிறி விடும் வியர்வை

உட்பட யாவற்றுக்கும் வாடகை கேட்கும் இவ்வறை

தினம் நான்கைந்தோ ஆறேழோ எட்டொன்பதோ

பத்து பதினொன்றோ பனிரெண்டு பதின்மூன்றோ

முறை வைக்காது இருபத்து நான்கு படிகள் ஏறி இறங்கும்

உழைப்பிற்கு யாரும் படி அளந்ததில்லை

சின்ன சின்ன வேலைகளைத் தொடர்ச்சியாகச் செய்து தந்ததற்கு

வீட்டுக்காரர் நயா பைசா படி அளந்ததில்லை

மாதா மாதம் ஐந்தாம் தேதி கடந்தால்

வாடகை கேட்டு வருபவர்

இருபத்து நான்கு படிகள் ஏறி இறங்கட்டும் என்பதற்காக

பத்து தேதி வரை வாடகையை இழுத்துக் கொண்டிருக்கிறேன்

படியேறி வந்து என்னைப் பார்ப்பதற்கும்

ஒருவர் இருந்து விட்டுப் போகட்டும்

உறவுகள் அற்று விட்ட மாநகரத்தில்

*****