பொட்டலப் பாலுக்கு மாற்றுப் பால்

பொட்டலப் பாலுக்கு மாற்றுப் பால்

பால் பொட்டலங்கள் (பாக்கெட் பால்) உங்களை ஆச்சரியப்படுத்துகிறதா? உங்களை அது ஆச்சரியப்படுத்தாது. நீங்கள் உங்களையும் உங்கள் வாழ்க்கையையும் உற்றுப் பார்ப்பவராக இருந்தால் அது உங்களை ஆச்சரியப்படுத்த வேண்டும்.

மாடுகள் குறையப் போகிறது, மக்கள் பாலுக்காக அவதிப்படக் கூடாது என்பதற்காக எப்படியோ பால் பொட்டலங்களைக் கண்டுபிடித்திருக்கிறார்கள். லூயி பாஸ்டர் இதற்கான அச்சாரத்தை எப்போதோ இட்டு விட்டார்.

நாம் நீண்ட காலம் மாடுகளைப் பிடித்துத் தொங்கிக் கொண்டிருந்தோம். கன்றுகளைக் கொன்று விட்டு அதன் வைக்கோல் பொம்மைகைளைக் காட்டி மாடுகளிடம் பாலைக் கறந்து கொண்டிருந்தோம். அதைப் பார்த்து உங்கள் உயிர்நேயம் பாதிக்கப்பட்டு இருக்கலாம். அப்படி ஒரு பாதிப்புக்கு நீங்கள் ஆளாகி விடக் கூடாது என்பதற்காகக் கூட பால் பொட்டலங்கள் கண்டுபிடிக்கப்பட்டிருக்கலாம்.

எங்கள் ஊர் பால்காரர் பாண்டியண்ணனை எடுத்துக் கொள்ளுங்கள். அவர் அசல் பசுமாட்டுப் பாலைக் கொண்டு வருதாகச் சொல்லிக் கொண்டு பொட்டலப் பாலை ஊற்றிக் கொண்டு விற்றுக் கொண்டிருக்கிறார்.

மக்கள் பொட்டலப் பாலை நோக்கி நகர்ந்து விட்டாலும் அதற்கு எதிர்நிலையில் இருக்கும் கறந்த மாட்டின் பாலுக்கு ஒரு வியாபார இடம் இருக்கும் என்பதை உணர்ந்தவர் பாண்டியண்ணன். அவரது வியாபாரம் அதை நம்பித்தான் இயங்கிக் கொண்டிருக்கிறது.

பொட்டலப் பாலின் விலை லிட்டருக்கு அறுபது ரூபாய்க்கு மேல். பாண்டியண்ணன் இன்னும் லிட்டர் நாற்பது ரூபாய்க்குத்தான் கொடுத்துக் கொண்டிருக்கிறார். பொட்டல பாலை வாங்கி ஊற்றினால் இது கட்டுபடியாகுமா என்று நீங்கள் கேட்கலாம்.

கட்டுபடியாவதற்கு நுட்பங்கள் இருக்கின்றன. பொட்டல பாலை வாங்கி ஊற்றி விட்டு நீங்கள் எவ்வளவு தண்ணீர் வேண்டுமானாலும் விட்டுக் கொள்ளலாம். கூடவே வெள்ளை சர்க்கரையை (சீனியை) வாங்கிக் கொட்டி விட வேண்டும் என்ற நுட்பத்தை அவர் வைத்திருக்கிறார். இதனால் பாலுக்கு ஒரு பிசுபிசுப்பு மற்றும் கொழகொழ தன்மையும் அடர்வு கூடிய தன்மையும் வந்து விடுவதாக அவர் நுட்பத்தைக் கண்டறிந்து வைத்திருக்கிறார்.

பச்சிளம் குழந்தைகள் குடிக்கும் பாலில் இப்படிச் செய்யலாமா என்று நீங்கள் கேட்கலாம். நாம் மட்டும் யோக்கியமா என்ன? நம்மில் சிலர் பச்சிளம் குழந்தைகள் குடிக்க வேண்டாம் என்பதற்காகத் தாய்ப்பாலை நிறுத்தியவர்கள்தானே?

நம்மிடம் காசிருந்தால் பத்து மாதம் சுமந்து கஷ்டப்படாமல் வாடகைத் தாய் மூலம் குழந்தை பெற்றுக் கொள்வதைத்தானே விரும்புகிறோம். நம் குழந்தைகளுக்காக ஒரு தியாகத்தைச் செய்ய முடியாத நாம் பாலில் ஒரு பால்காரர் நேர்மையாக நடந்து கொள்ள வேண்டும் எப்படி எதிர்பார்க்க முடியும்?

கொடுக்கின்ற காசுக்கு ஒரு நேர்மையை நாம் எதிர்பார்க்கலாம். நம்முடைய காசால் அந்த நேர்மையை மட்டும் வாங்கி விட முடியாது. நேர்மைக்குப் புறம்பான எவ்வளவோ விசயங்களை நம்முடைய காசால் வாங்கி விட முடியும். நேர்மை எப்போதும் நம்முடைய காசிடமிருந்து தப்பிக் கொண்டே போகும்.

ஒவ்வொரு நாளும் எவ்வளவு பால் பொட்டலங்கள் விநியோகம் ஆகின்றன? உண்மையில் அவ்வளவு பொட்டலங்களுக்கும் பால் கொடுக்கும் அளவுக்கு மாடுகள் இருக்கின்றனவா?

மாடுகள் இல்லாவிட்டாலும் அவ்வளவு பால் பொட்டலங்களை நிரப்பும் அளவுக்கு எப்படியோ பால் தயாராக வேண்டும். பால் பாக்கெட்டுகளுக்கு அப்புறம் தயிர் பொட்டலங்கள் இருக்கின்றன. தயிர் பொட்டலங்களைத் தொடர்ந்து வெண்ணெய் பொட்டலங்கள் இருக்கின்றன. வெண்ணெய் பொட்டலங்களைத் தொடர்ந்து நெய் புட்டிகள் இருக்கின்றன. பிறகு பன்னீர் போன்ற வகையறாக்கள் இருக்கின்றன.

இவை எல்லாம் எப்படியோ தயாராகின்றன. தொழிற்சாலைகள் இருந்த விட்டால் போதும் எப்படியும் தயாரித்து விடலாம். இவற்றின் இயற்கைத்தன்மை, உடலுக்கு உகந்த தன்மையைப் பற்றி நாம் கேள்வி எழுப்ப முடியாது. கேள்வி எழுப்பினால் இவற்றை நாம் உட்கொள்ள முடியாது.

இந்தப் பால் பொட்டலங்களுக்கு என்ன மாற்றுத் தீர்வு என்று நீங்கள் கேட்கலாம். தீர்வு அவ்வளவு கடினமானதா என்ன? நீங்கள் ஒரு மாடு வளர்க்கலாம். நீங்கள் நகரத்தில் இருபதுக்கு இருபது என்ற கொட்டடியில் இருந்தால் அது உங்களால் முடியாது. உங்கள் பசியைப் போக்கவே நீங்கள் அலைந்து கொண்டிருக்கும் போது மாட்டை மேய்த்து அலைந்து அதன் பசியைப் போக்க உங்களால் முடியாது.

கிராமத்திலும் மாடு வளர்ப்பு லாபகரமானதாக இல்லை. இல்லை என்று தெரிந்தாலும் வங்கிகள் கறவை மாட்டுக் கடன் கொடுப்பதை விட்டபாடில்லை. ஐம்பதாயிரத்துக்கு மாட்டுக்கடன் வாங்கி விடலாம். அதில் பதினைந்தாயிரத்தை நீங்கள் வெட்டி விட்டு அதாவது கையூட்டாகக் கைகழுவி விட்டு மீதி முப்பதினாயிரத்தை மாட்டை வாங்காமல் வேறு ஏதாவது ஒன்றிற்காகப் பயன்படுத்திக் கொள்ளலாம். இதற்கு உண்டான கடனுக்கான மானியத்தையும் நீங்கள் பயன்படுத்திக் கொள்ளலாம்.

கணக்கில் எப்படிப் பதிவாகியிருக்கும் என்றால் இத்தனை லட்சம் மாடுகளுக்கு அதாவது கறவை மாட்டிற்கான கடன் வழங்கப்பட்டிருப்பதாக. அத்தனை எண்ணிக்கையில் நீங்கள் நகலெடுத்து நகலாக்கம் (காப்பி – பேஸ்ட்) செய்திருந்தால்தான் அது சாத்தியம்.

இங்கு மாடுகளே இல்லை என்று சொன்னால் நீங்கள் நம்பித்தான் ஆக வேண்டும். ஆனால் இருக்கின்ற மாடுகளைக் கொண்டு, கறக்கின்ற பாலைக் கொண்டு கொள்முதல் நடந்து கொண்டு இருக்கும். அந்தப் பாலைக் கொண்டு மேற்கொண்டு எவ்வளவு அதிகமாகச் செய்து கொள்ள முடியும் என்பது தொழிற்சாலைகளுக்குத் தெரியும். அவை அந்த அளவுக்கு அதிமாக்கிக் கொள்ளும்.

நீங்கள் குடிக்கும் பாலில் மாட்டின் பால் சில சதவீதம் இருக்கக் கூடும். ஏதோ ஒரு குறிப்பிட்ட சதவீதமாக இருக்கிறது என்பதற்காக நீங்கள் திருப்தி பட்டுக் கொள்ள வேண்டும். உங்களுக்கு அந்த அளவுக்குக் கிடைத்தது கூட பெருங்கருணை சார்ந்த விசயம்தான். அது கூட இல்லையென்று போயிருந்தால் என்னதான் செய்திருப்பீர்கள்?

எனக்கு இதெல்லாம் வேண்டாம் என்றால் மற்றொரு தீர்வு இருக்கிறது. அதற்காகத்தான் நான் இந்தப் பத்தியை எழுதத் துவங்கினேன். இந்தப் பாலை நீங்களே தயாரித்துக் கொள்ளலாம். நம்பகமான பால். அதுதான் தேங்காய்ப் பால்.

மாட்டுப் பாலுக்கு நல்ல மாற்று இந்தத் தேங்காய்ப்பால். வயிற்றுக்கும் ஒட்டுமொத்த உடலுக்கும் நன்மை செய்யக் கூடிய அருமையான பால். இந்தப் பத்தியைப் படித்த எவரேனும் அதையும் ஒரு வியாபார முறையாகச் செய்யத் துவங்கலாம். அப்படி ஏதாவது ஆரம்பமானால் அதன் நம்பகத்தன்மையை குறித்து எல்லாம் ஆராய்ந்து பார்க்க வேண்டியிருக்கும் என்பதை எப்போதும் நினைவில் வைத்துக் கொள்ள வேண்டும்.

ஆகவேத்தான் ஒன்று சொல்கிறேன். அந்த நம்பகத் தன்மை குறித்த ஆய்வுகளுக்கு எல்லாம் செல்லாமல் நீங்களே தேங்காயை வாங்கி, துருவி, பிழிந்தெடுத்து உங்கள் சொந்தக் கைப்பக்குவத்திலேயே அந்தப் பாலைக் குடியுங்கள்.

இருக்கின்ற இடம் கொஞ்சமானாலும் ஒரு தென்னங்கன்றை நட்டு வையுங்கள். நீங்கள் அதிலிருந்து கிடைக்கப் போகும் தேங்காய்ப் பாலைக் குடிக்காவிட்டாலும் உங்கள் தலைமுறை குடிக்கும். ஒரு மாட்டை வளர்த்து பாலைக் கறந்து குடிப்பதை விட இந்தத் தேங்காய்ப்பால் முறை எளிமையானதுதான்.

நல்ல பாலைக் குடிக்க வேண்டும் என்று நினைப்பவர்கள் இந்தத் தேங்காய்ப் பால் முறைக்கு மாறிக் கொள்ளுங்கள். பொட்டலப் பாலே பரவாயில்லை என்று நினைப்பவர்கள் அப்படியே இருந்து கொள்வதை வேறு ஏதேனும் வழியிருக்கிறதா?

*****