இந்தா வாழ்த்து எடுத்துக் கொள்

இந்தா வாழ்த்து எடுத்துக் கொள்

மூன்று நாள் சாப்பாட்டிற்கு

என்ன செய்வதென்று

யோசித்து யோசித்துச் சோர்ந்து போகிறேன்

ஹேப்பி பொங்கல் சொல்லி விட்டுப் போகிறான்

மாநகர வாழ்க்கை புரியாதவன்

*****

அட்வான்ஸ் வாழ்த்துகள்

ஹலோ ஹலோ

நான் அப்பாவாகி விட்டேன் என்று

எவ்வளவு சந்தோசமாய்ச் சொல்கிறான்

இருக்கட்டும் சந்தோஷமாகவே இருக்கட்டும்

எல்.கே.ஜி.க்கு சீட்

இரவு கண் விழித்து ப்ராஜக்ட்

ஊதியமில்லா விடுப்பில் பெற்றோர் கூட்டம்

கராத்தே கிரிக்கெட் ஸ்விம்மிங்

ஆல் இந்தியா டூருக்கு கந்து வட்டிக் கடன்

பேமன்ட் சீட் கல்விக் கடன்

ஹாஸ்டலில் தங்குவதற்கு புல்லட்

அப்பாவாகக் கடக்க வேண்டிய நிறைய தூரம் இருக்கிறது

அப்பாவாகி விட்டதாக மகிழ்பவனிடத்து

இப்போதே ஏன் பயமுறுத்த வேண்டும்

அப்பாவாக அட்வான்ஸ் விஸஸ் என்று மட்டும்

சொல்லித் துண்டித்துக் கொண்டேன்

*****

நிலையாமைக்குப் பின் சமத்துவம்

பாடை நல்லது

உன்னைச் சுமக்கிறது

மாலை மோசம்

உன்னைச் சுமக்க செய்கிறது

உன்னைக் கேட்டால்

பாடை மோசம்

மாலை நல்லது என்பாய்

ஏறி நெஞ்சில் மிதிப்பவர்களுக்கு

எப்போதும் தனி மதிப்பு

எட்டி மிதித்தும் எப்போதும் சுமப்பவர்களுக்கு

என்றும் இளக்காரம்

கனி தராத மல்லிகைக்குத்தான்

தலையில் சூடும் மதிப்பு

சுவையான கனி தரும்

வாழையின் பூவைத் தலையில் சூடுவார் யார்

பயனுள்ளவைச் செரிக்கப்படும்

மேனாமினுக்கிகள் உச்சி முகரப்படும்

முடிவில் சமத்துவம் பேணுவதற்கென

யாவும் கழிவுகளாக் கொள்ளப்படும்

*****