அழுக்காறு என ஒரு பாவி
உன் பண இருப்பு அல்ல
உன் சுகபோக ஊர்தி அல்ல
உன் உல்லாச மாளிகை அல்ல
உன் பெண் சிநேகிதி அல்ல
உண்மையைச் சொன்னால்
உனக்கு முடி இருப்பது அல்ல
எனக்கு முடி இல்லாமல் இருப்பதே
உன் மீதான என் பொறாமையை
வளர்த்துக் கொண்டிருக்கிறது
கொழுந்து விட்டு எரியும்
முடி காட்டில்
உன் முடிகள் ஒட்டு மொத்தமாக
உதிர்ந்து போகும் நாளில்
என் பொறாமையும் உதிர்ந்து
போகலாம்
*****
பாழாய்ப் போன புயல்
விடாது பெய்யும் மழை
பரபரப்பாக இயங்கிக் கொண்டிருக்கும்
வானிலை ஆய்வு மையம்
தலைப்புச் செய்திகளுக்காக
எல்லாரும் காத்திருக்கிறார்கள்
புயல் திசை தவறிப் போய்விட்டதாக
அறிவிப்பு வருகிறது
எல்லாரும் கன்னத்தில் கை
வைத்தபடி
ஏமாற்றத்தோடு செல்கிறார்கள்
இந்த வருடமும்
நிவாரணத்தில் மண்ணள்ளிப்
போட்டு விட்டது
பாழாய்ப் போன புயல்
*****
கண்ணதாசன் பாட்டு
எப்போதோ போட்ட சோற்றிற்கு
இப்போதும் விசுவாசமாய்
வாலை ஆட்டுகிறது நாய்
எப்போதும் போட்ட சோற்றைத்
தின்று விட்டு
இப்போது பெண்டாட்டி சொல்
கேட்டு
வீட்டை விட்டுத் துரத்துகிறது
பிள்ளை
நாய்க்குக் கல்யாணம் செய்யாது
போனது
நல்லதாகப் போய் விட்டது
கல்யாணம் செய்து வைப்பதற்கு
முன்
கொத்தி விரட்டி விடும் கோழி
மேலானது
கண்ணதாசன் இருந்திருந்தால்
பிள்ளையைப் பெற்றால் தெருவோரம்
நாயை வளர்த்தால் சாவு வரை
வரும்
என்று பாடியிருப்பார்
*****
No comments:
Post a Comment