அம்மாவைப் போல மழை

பார்க்கவும் பேசவும் நினைத்தவர்கள்

நீதானா என்று கேட்டவரிடம்

ஆம் நான்தான் என்றதும்

படபடக்க ஆரம்பித்துவிட்டார்

இத்தனை நாளாய்ப் பார்க்க வேண்டும்

பேச வேண்டும் என்றிருந்த

ஆசைகள் அத்தனையையும்

அவசர அவசரமாகப் பகிர்ந்து விட்டு

அவசர அவசரமாகக் கிளம்புவதற்கு

வருத்தம் தெரிவித்து விட்டுக் கிளம்பி விட்டார்

இனி அடுத்து நீதானா என்று கேட்பவரிடமும்

நான்தான் என்று சொல்ல வேண்டும்

அவரும் பார்க்க நினைத்த பேச நினைத்த

ஆசைகளைச் சொல்லி

அவசர அவசரமாகக் கிளம்பி விடுவார்

பேச நினைக்கும் ஒரு வார்த்தையைக் கூட

அவர்களைப் போல பார்க்க பேச நினைத்த

நான் பேசவில்லை என்பதில் யாருக்கென்ன கவலை

*****

கடவுளே உங்கள் கவலைகளைச் சொல்லுங்கள்

கோயிலுக்கு வந்ததும்

கடவுளிடம் கவலைகளைக் கொட்டித் தீர்க்கிறார்கள்

அவர் கேட்டுக் கொண்டே இருக்கிறார்

கிளம்பட்டுமா எனும் போது

சரி கிளம்பு என்கிறார்

பார்த்த நாளிலிருந்து அங்கிருக்கும்

கடவுளிடம் சொல்ல

ஏகப்பட்ட கவலைகள் நமக்கு இருக்கின்றன

அவரது கவலைகளைச் சொல்ல

அவருக்கு யார் இருக்கிறார்கள்

ஒரு நாளாவது கேட்டுப் பார்க்க வேண்டும்

உங்கள் கவலைகளை என்னிடமாவது சொல்லுங்கள் என்று

*****

அம்மாவைப் போல மழை

ஒரு நாளாவது வீடடைந்து கிட என

மழை பெய்கிறது

நான் குடையைப் பிடித்துக் கொண்டு

வெளியில் கிளம்புகிறேன்

எனக்கென்ன எக்கேடு கெட்டாவது போ

என அப்போதும் பெய்து கொண்டே இருக்கிறது மழை

அம்மாவைப் போல

*****