திருப்தியின் இருக்கைகள்

நண்பர்களின் வருகை

நண்பர் இறந்து நாளாகி விட்டது

இன்னும்

என்னனென்னவோ

கனவில் தினம் வந்து பேசிக் கொண்டிருக்கிறார்

என்றாவது ஒரு நாள்

கனவிலும் வந்து போகாமல் இறந்து போவார்

அப்போது இன்னொரு நண்பர் இறந்து

கனவில் வந்து போகத் தொடங்குவார்

கனவில் வந்துப் போவதற்காகவா

என் நண்பர்களே இறந்து போகிறீர்கள்

என்று கேட்டால்

கனவில் வந்துப் போகும் நண்பர்கள்

சிரித்துக் கொள்கிறார்கள்

நண்பர்கள் இறந்தால் அழுவது நின்று

நானும் சிரித்துக் கொள்கிறேன்

*****

திருப்தியின் இருக்கைகள்

வரிசையாக ஒவ்வொரு இருக்கையாக

அமர்ந்து பார்க்கிறார்

எந்த இருக்கையும் திருப்திபடுவதாகத் தோன்றாமல் போக

திபுதிபுவென வந்துப் புகும் கூட்டம்

திருப்திபடா இருக்கை ஒன்றில்

அமர வைக்கிறது

நல்லவேளை நடுவில் ஒரு இருக்கை கிடைத்ததென

இப்போது திருப்தி பட்டுக் கொள்கிறார்

மேலும் மேலும் கூட்டம் வர

அமர்ந்திருக்கும் இருக்கையின் திருப்தி

அதிகமாகிக் கொண்டே போகிறது

இறங்கும் நிறுத்தம் வரும் போது

திருப்தி தந்த இருக்கையை விட்டு

திரும்பிப் பாராமல் கூட

இறங்கிப் போகிறார்

இன்னொருவர் திருப்தியுடன் அமர்ந்து கொள்கிறார்

இறங்கும் வரை திருப்தியை அனுபவித்துக் கொள்ளும் ஆசையில்

*****