அடைத்து வைக்கும் கதவுகள்

பிரக்ஞையற்றதன் இயக்கம்

ஏறுகிறார்கள்

இறங்குகிறார்கள்

ஏறுவதோ இறங்குவதோ

எந்த நோக்கமில்லாமல்

மாடிப்படி அங்கேயே இருக்கிறது

நோக்கத்தை வரிந்து கட்டிக் கொள்பவர்கள்

ஏறிக் கொண்டும் இறங்கிக் கொண்டும் இருக்கிறார்கள்

*****

எறிதலின் ரத்தம்

தம் மகள்களின் கால்களில்

குத்தப் போவது தெரியாது

குவார்ட்டர் பாட்டில்களை

வீசி எறிகிறார்கள்

குடிகார தகப்பன்மார்கள்

*****

அடைத்து வைக்கும் கதவுகள்

கதவு எவ்வளவு விசயங்களை

அடைத்து வைத்திருக்கிறது என

ஆச்சரியப்படுபவர்

கதவுக்கு வெளியே இருக்கும்

ஆச்சரியங்களைக் கவனிக்காமல்

கதவுக்குள் அடைந்து கிடக்கும்

ஆச்சரியங்களைக் கவனிக்கிறார்

கதவுக்குள் அடைந்து

விட்டு விடுதலையாகும் பொழுதில்

ஆச்சரியங்கள் அடைந்து கிடப்பது

உள்ளேயல்ல வெளியே என்பது

புலப்படக் கூடும்

எல்லாரும் நினைப்பது போல

எல்லாரையும் அப்படி விடுதலை செய்து விடுவதில்லை

கதவுகள்

*****