பொட்டை
இங்கும் அங்கும்
அங்கும் இங்கும்
எங்கும்
எப்படியெப்படியோ அலைந்து
பார்க்கிறது
நாய்க்குட்டி
தூக்குவார் இல்லை
அதைச் சொல்வதா
யாரைச் சொல்வது
பொட்டை என்ற
*****
13 லிருந்து 39 வரை
மினுக்கி மினுக்கி வரும்
மின்சாரத்தை நம்ப முடியாது
வந்தாலும் வந்ததுதான்
போனாலும் போனதுதான்
மைனர் குஞ்சு சொல்வதைக் கேட்டு
அர்த்த புஷ்டியுடன் சிரித்துக்
கொண்டவர்கள்
இந்தத் திருவிழாவிற்கு இது
போதுமென்று
எழுந்து செல்கிறார்கள்
முப்பத்து ஒன்பதாகியும்
முதிர் கண்ணன்களாய் நிலைத்து
விட்ட
மைனர் குஞ்சு உட்பட பதின்மூன்று
பேர்
*****
மறந்து விடும் பழக்கம்
இதோ இப்போதோ
இன்னும் கொஞ்சம் காலம் கடந்தோ
அல்லது
சற்று நேரத்திலோ
அதுவும் தப்பிப் போனால்
சில நாட்களிலோ
அதுவும் தப்பிப் போனால்
சில வாரங்களிலோ மாதங்களிலோ
மழையைத் திட்டியவர்களும்
மழையைச் சபித்தவர்களும்
வீதியில் இறங்கி நடந்து கொண்டிருப்பார்கள்
மழையைப் பற்றிய பிரக்ஞையின்றி
மறுபடியும் திட்டும் சாபமும்
வாங்க
மழை வரக் காலமாகும் வரை
மழையை வாழ்த்துவதை விட்டு
விடலாம்
மழையை நினைக்க யார் இருக்கிறார்கள்
விருந்தோம்பும் பழக்கம் உள்ளவர்கள்தான்
என்றாலும்
வந்தால் நினைப்பவர்கள்
வராமல் போனால் மறந்து விடுவார்கள்
*****
No comments:
Post a Comment