நியாயத்தின் பக்கம் நிற்றல்

நியாயத்தின் பக்கம் நிற்றல்

ஒவ்வொரு பக்கமும் ஒவ்வொரு நியாயம் இருக்கிறது

ஒரு நியாயம் அதை உண்மை என்கிறது

மற்றொரு நியாயம் பொய் என்கிறது

ஒரு நியாயத்தின் படி விஷம் என்பது விஷம்

மருந்தென்பது மருந்து

இன்னொரு நியாயத்தின்படி

விஷம் என்பது மருந்து

மருந்தென்பது விஷம்

ஒன்றை அப்படியே வைத்திருக்கும் நியாயங்களுடன்

ஒன்றை இன்னொன்றாக மாற்றும் நியாயங்களும்

மனிதர்களிடம் இருக்கின்றன

எந்த நியாயத்தைத் தேர்ந்து கொள்வது என்ற குழப்பம்

எல்லா காலத்திலும் இருந்து கொண்டிருக்கிறது

ஏற்றுக் கொள்வது ஒரு வகை நியாயம்

மறுப்பது வேறொரு வகை நியாயம்

எந்த நியாயத்தின் பக்கமும் நிற்கலாம்

எந்த நியாயத்தையும் நியாயப்படுத்திக் கொள்ளலாம்

உங்கள் நியாயம் குறைந்தபட்சம்

உங்கள் மனதுக்கேனும் உறுத்தாமல் பார்த்துக் கொள்ளுங்கள்

*****