முன்னெப்போதும் சொல்லாத கதை

முன்னெப்போதும் சொல்லாத கதை

இந்த முன்னிரவில் சொல்ல

உனக்கெனச் சில கதைகளைச் சேர்த்து வைத்தேன்

பாதி கதை சொல்லி முடிப்பதற்குள்

உறக்கத்தின் விளிம்பில் சொன்னாய்

மீதிக் கதையைக் கனவில் கேட்டுக் கொள்கிறேன் என்று

உன் கனவுக்குள் நான் வருவதெப்படி

கனவுக்குள் நீயிருந்து கதை கேட்பதெப்படி என

உறக்கம் வராத பின்னிரவு வரை யோசித்துக் கொண்டிருந்தேன்

பிறகெப்படி உறங்கிப் போனென்று தெரியாது

கண்ணயர்ந்துப் போனேன்

காலையில் எழுந்ததும்

கனவில் கேட்ட மீதி கதை அற்புதம் என்றாய்

கனவில் நான் சொன்ன மீதிக் கதை

என்னவென்று புரியாமல் நான் குழம்பி நின்றேன்

கனவில் கேட்ட மீதிக் கதையை

நீ சொல்ல ஆரம்பித்தாய்

நான் முன்னெப்போதும் சொல்லாத கதையை

கதை சொல்லும் உன்னிடம் கேட்டுக் கொண்டிருந்தேன்

*****