ருசி மரணித்துப் போனவர்கள்

ருசி மரணித்துப் போனவர்கள்

ஒன்று இரண்டு மூன்று என்று

எடுத்து ஊற்றினால் வற்றிப் போய் விடும் ஊற்று

அடுத்து எடுத்து ஊற்றுவதற்கு

அந்த ஊற்றை நம்பித்தான் காத்திருக்க வேண்டும்

மீண்டும் ஒன்று இரண்டு மூன்று என்று

எடுத்து ஊற்றினால் வற்றிப் போய் விடும்

மீண்டும் நம்பிக்கையோடு காத்திருக்க வேண்டும்

எடுத்தெடுத்து ஊற்றி மறுபடியும் ஊறும் என

நம்பிக்கையோடு காத்திருப்பதுதானன்றோ

வாழ்க்கையெனும் ஊற்று

எவ்வளவு வேண்டுமானாலும் எடுத்து ஊற்றலாம்

நம்பிக்கையோடு காத்திருந்து காத்திருந்து

எடுத்து எடுத்து ஊற்ற வேண்டும்

காத்திருக்க விருப்பம் இல்லாதவர்கள்

பாட்டில் தண்ணீரையோ கேன் தண்ணீரையோ

வாங்கி வாங்கி ஊற்றலாம்

ஊற்று நீரின் ருசியும்

காத்திருப்பு தரும் சுவையும்

வாங்கிக் கொடுக்கும் நீரில்

இல்லாது போகும் அதிசயத்தை

யார்தான் ஊன்றி கவனித்துக் கொண்டிருக்கப் போகிறார்கள்

*****