நிரம்ப யோசிக்காதவனின் ஒரு நாள்

நிரம்ப யோசிக்காதவனின் ஒரு நாள்

நிரம்ப யோசித்து தவறவிட

நான் தயாராக இல்லை

யோசிப்பது குறைவு

மன்னார்குடிக்கு ஒரு பயணச் சீட்டு

திருவாரூருக்கு ஒரு பயணச் சீட்டு

இடையில் இறங்குவதென்றால்

அந்த ஊர் பெயரைச் சொல்லி ஒரு பயணச் சீட்டு

ஊர் வந்தால் விசில் ஊதி இறங்கு என்கிறார்கள்

இறங்கிக் கொள்கிறேன்

தேநீர்க் கடையில் தேவைக்கேற்ப

ஒரு விரலோ இரு விரலோ நீட்டினால் போதும்

கண்ணாடிக் குவளையில்

கொதிக்க கொதிக்க வந்து விடுகிறது

பத்து ரூபாயோ இருபது ரூபாயோ

இருக்கிற தாளை எடுத்து நீட்டினால்

சில்லரை எடுத்து வைக்கப்பட்டு விடுகிறது

அதற்கு மேல் முத்துப்பாட்டன் வீடு

எங்கிருக்கிறது என்று விசாரித்தால்

அவர் வீட்டுப் பக்கம் செல்லும்

ஒருவரின் வண்டியில் ஏற்றிச் செல்லப்படுகிறேன்

அதற்கு மேல் யோசிக்க என்ன இருக்கிறது

முத்துப்பாட்டன் வீட்டுக்குச் சென்றால்

அவர் பேசிக் கொண்டே இருப்பார்

கேட்டுக் கொண்டே இருக்க வேண்டியது

நேரமாகி விட்டால் அவரே அழைத்து வந்து

வண்டியேற்றி விட்டு விடுவார்

என் ஊர் பெயர் சொல்லி

ஒரு பயணச் சீட்டு வாங்கிக் கொண்டால்

ஊர் வந்து சேரலாம்

நிரம்ப யோசிக்காததால்

நிம்மதியாக உறங்க முடிகிறது

இந்த இரவில் முத்துப்பாட்டன் உறங்கியிருப்பாரா

என்பதை யோசித்தாலும்

உறக்கத்தினின்று விழித்து விடுவேன் என்பது

எனக்குத் தெரியும்

*****