புதுப்பித்துப் போகும் புயல்

புதுப்பித்துப் போகும் புயல்

ஒரு புயல் வீசுகிறது

காற்று பின் சகஜமாகிறது

மக்களுக்கென்ன

புயலடிக்கையில் பாதுகாப்பாக இருந்து கொண்டு

ரசிக்கத்தான் செய்கிறார்கள்

விசிலடிப்பவர்களும் உண்டு

இவ்வளவு மரங்கள் முறிவதை

அவ்வளவு தண்ணீர் தேங்குவதை

வேறெப்போது பார்க்க முடியும் என்கிறார்கள்

இருப்பவருக்கு ஆயிரம் பத்தாயிரம் உண்டு

அதில் கவலைகளும் உண்டு

இல்லாதவருக்கு என்ன இருக்கிறது

அதில் கவலைகளும் இல்லை

இன்னொரு புயல் அடித்தால்தான் என்ன

நாம் சொல்லி கேட்கவா போகிறது

அடிப்பதும் அடிக்காமல் போவதும் அதன் விருப்பம்

ஒரு புயல்

இருக்கின்ற சொத்து சுகங்களை

அழித்து விட்டுப் போனாலும்

நிறைய நீரையும்

நிறைய வேலைகளையும்

கொஞ்சமேனும் மனித நேயத்தையும்

மனிதர்களுக்குத் தந்து விட்டுதான் போகிறது

*****