அற்புதங்களை நிகழ்த்துதல்

அற்புதங்களை நிகழ்த்துதல்

அந்தப் பொழுதில்

ஏதோ சொல்லப்பட்டது

ஏதோ நிகழ்த்தப்பட்டது

அர்த்தங்கள் செய்து கொண்டது அவரவர்கள்

அர்த்தப்படுத்திக் கொண்டதன் வழியாக

மீண்டெழுந்தது

சொல்லப்பட்டதும் நிகழ்த்தப்பட்டதும்

பிறகது அற்புதமாய் வியாபித்துக் கொண்டது

அந்த அற்புதத்தை நிகழ்த்திப் பார்க்க

ஆளாளுக்கு முயற்சித்துப் பார்க்க

எந்த முயற்சியும்

முன்னர் அர்த்தப்படுத்திக் கொண்டதற்கு நிகராக

நிகழாமல் போக

அற்புதங்களுக்கான முயற்சிகள்

ஆண்டாண்டுகளாகத் தொடர்கின்றன

யாரேனும் ஒருவர்

திடீரெனப் புறப்பட்டு

அர்த்தப்படுத்திக் கொண்டதை மாற்றலாம்

அப்போது புதிய அற்புதங்கள் நிகழலாம்

அற்புதங்களில் என்ன இருக்கிறது

அர்த்தப்படுத்திக் கொள்வதில்தான் எல்லாம் இருக்கிறது

*****