கால நதியை வேடிக்கை பார்த்தல்

கால நதியை வேடிக்கை பார்த்தல்

இது இன்றைய நாளோடு முடிந்து விடக் கூடும்

நாளை வேறொன்றாகத் தொடரக் கூடும்

வேறொரு நாளாக மாறி விடவும் விடும்

முந்தைய தினத்தின் நினைவுகள்

நேற்றை இன்றும் வேண்டும் என வேண்டக் கூடும்

நாளையும் அப்படியே வேண்டும் எனவும் மன்றாடவும் கூடும்

காலமென்ன இயந்திரமோ

கைகளுக்குக் கட்டுப்பட்டு இயங்காமல் போகக் கூடும்

ஒவ்வொரு நாளிலும் சலிப்பு மட்டும்

ஒரே மாதிரியாக இருப்பதாகத் தோன்றக் கூடும்

ஒவ்வொரு நாளின் சலிப்பும்

ஒவ்வொரு மாதிரி

சலிப்பை கவனிப்பதில்லை என்பதைக் கவனிக்காதிருக்கக் கூடும்

விருப்பமானவற்றை மட்டும் கொடுக்க

காலம் கற்பக விருட்சத்தின் நகலாகுமோ

சாத்தானின் விருட்சமாகி

விலக்கப்பட்ட கனிகளைக் கொடுக்காமல் இருக்குமோ

காலம் கைநீட்டித் தரும் கனிகளை

புசிப்பதும் புசிக்காமல் இருப்பதும்

ஆசையின் சூலினுக்குள் இருக்கும் சூட்சமம்

சூலுக்குள் விழும் மகரந்தத்திற்கேற்ப

காலம் நதியைப் போலாகிப்

புசித்தவர்களை இழுத்துச் செல்லக் கூடும்

புசித்தலின் விருப்பமற்றவர்கள்

காலந்தோறும் கரையோரம் நின்று

கால நதியை வேடிக்கை பார்த்துக் கொண்டிருக்கக் கூடும்

*****