வெடிக்கும் பொழுதின் வெளிச்சங்கள்
ஒரு பொழுது
எல்லாவற்றையும் உடைத்துப்
போட்டு விடும்
எல்லாருக்கும் அப்படி
ஒரு பொழுது இருக்கிறது
ஞானவான்களாக ஆகத் துடிப்பவர்கள்
அந்தப் பொழுதைத் தேடிக் கொண்டிருக்கிறார்கள்
தேடாமல் இருப்போருக்கும்
அந்த ஒரு பொழுது வரத்தான்
போகிறது
காலப் பெருவெளியின்
ஒரு பொழுதில்
எல்லாம் உடைந்துச் சிதற வேண்டியவைதான்
உன்னைத் தேடிக் கொண்டு வரப்
போகும்
ஒரு பொழுதை
நீ தேடிக் கொண்டு அலைய வேண்டியதில்லை
வெடிக்கப் போகும் வரை திருப்தியாக
இரு
வெடித்தப் பின்னும் அப்படித்தான்
இருக்கப் போகிறாய்
வெடிப்பது என்பது ஒரு நிகழ்வு
அது நிகழும் போது நிகழ்ந்து
விட்டுப் போகட்டும்
வெடிப்பதை வெளிச்சம் போட்டுக்
காட்ட
என்ன இருக்கிறது
வெடிக்கும் போது அதுவே
வெளிச்சம் போட்டுக் கொள்ளும்
கடக்காது தவிர்த்தாலும்
ஒவ்வொரு பொழுதும் கடந்து
கொண்டுதான் இருக்கும்
*****
No comments:
Post a Comment