ஒழுங்கு நாடகம் ஆடுவோர் கவனத்துக்கு

ஒழுங்கு நாடகம் ஆடுவோர் கவனத்துக்கு

இதற்கு மேல் முடியாது எனும் போது

மூச்சு முட்டியா இறந்து போக முடியும்

சற்றேனும் ஓய்வு கொள்ள வேண்டும்

முடிந்தது முடித்ததையெல்லாம் மறந்து போக வேண்டும்

ஓய்வு கொள்ளுதலில் அலுப்பு ஏற்படும் போது

இதற்கு மேல் முடியாதெனத் தோன்றும் வரையில்

செய்து கொண்டிருக்க வேண்டும்

மீண்டும் ஓய்வு மீண்டும் செய்கை என்றில்லாமல்

சில முறை எங்கேயாவது ஓடிக்

காணாமல் போகத்தான் வேண்டும்

எல்லாரும் தேடி முடித்துக் களைத்த பிறகு

எல்லார் முன்னும் தோன்றத்தான் வேண்டும்

உன் கைப்பிடி என் கைப்பிடி எல்லாரின் கைப்பிடி என்று

யாருடைய கைப்பிடிக்குள்ளும் அடங்காதது வாழ்க்கை

என்பதைச் சொல்லிச் சொல்லிச் சிரித்துதான் ஆக வேண்டும்

நேற்று கண்ணில் பட்டவரா

இன்று காணாமல் போய் விட்டார் என்று

எல்லாரும் பேசத்தான் வேண்டும்

போனவர் போனவர்தான் என்று

இருப்பவர் எல்லாம் எப்போதும் போவார் என்று

இருப்பவரைப் பற்றியும் பேச வேண்டும்

இருப்பவர் போகுபவர் என்பதெல்லாம்

பேசுவதிலும் சொல்வதிலும் இருக்கிறதா என்று

அதையும் சொல்லிச் சொல்லிச் சிரிக்க வேண்டும்

எல்லா அபத்த நாடகமும்

வாழ்க்கை என்ற பெயரிலன்றோ நடந்து கொண்டிருக்கிறது

என்பதை எல்லார் அறிய ஒரு முறையேனும் சொல்ல வேண்டும்

குறிப்பாக ஒழுங்கு நாடகம் ஆடுவோர் முன்னிலையில் ஒரு முறையேனும்

*****