அழுகையின் ஊடே அனுப்பப்பட்டவர்

அழுகையின் ஊடே அனுப்பப்பட்டவர்

பிரசவமான குழந்தை எவ்வளவு அழுதும்

கருவறைக்குள் அனுப்ப

அந்தத் தாதி தயாராக இல்லை

பள்ளிக்குச் சென்ற போதும்

அழுத அந்தக் குழந்தையை

வீட்டிற்கு அழைத்து வரத் தாய் தயாராக இல்லை

வளர்ந்த பின்பு வெளிநாடு செல்ல நேர்ந்த போதும்

அழுத அப்பெரிய குழந்தையை

உன் தேசத்திலே இரு என்று சொல்ல யாரும் தயாராக இல்லை

மேலும் வளர்ந்து சருமம் தளர்ந்து முடிகள் வெளுத்து

முதியோர் இல்லம் செல்ல அழுத போதும்

நீ கட்டிய வீட்டிலேயே இரு என்று சொல்ல யாரும் தயாராக இல்லை

கடைசியாக உயிர் மூச்சை உதிர்த்து

இகலோகம் விட்டு பரலோகம் சென்ற போது

அந்தக் குழந்தை அழவில்லை

அந்தக் குழந்தை இன்னும் கொஞ்ச நாள்

இங்கே இருந்திருக்கலாம் என எல்லாரும் அழத் தொடங்கினர்

*****