அள்ள முடியாத காலம்

அள்ள முடியாத காலம்

இப்படிதான் என்று முடிவு கட்டி விடாதீர்கள்

இப்படியில்லை என்றால்

அப்படிதான் என்றும் தயவு செய்து முடிவு கட்டி விடாதீர்கள்

எது எப்போது எப்படி என்பது

அந்தந்த கணத்தில் தீர்மானமாகின்றன

ஒரு கணத்தின் சாத்தியக்கூறுகளை

மனதின் சின்ன கணக்கீட்டில் சுருக்கிட முடியாது

ஒரு சுருக்குப் பையில் ஒளிந்து கொள்ளும் அளவுக்கு

காலம் இன்னும் கோழையாக வில்லை

காலத்தின் வீரத்திற்கு முன்பு நாம் தூசுக்கள்

சுனாமி அதற்குக் கைக்குட்டையைப் போன்றது

பூகம்பம் அதற்குப் புரண்டு படுப்பது போன்றது

புயல் அதற்குக் காது குடைவதைப் போன்றது

இடியும் மின்னலும் அதற்கு மந்தகாச சிரிப்பைப் போன்றது

எழுதி வைக்கப்பட்டிருக்கும் காலம்

கடற்கரையின் ஒரு மணல் அளவு

எழுதப்பட வேண்டிய காலம்

கடற்கரையின் மொத்த மணல் அளவு

காலத்தைக் கையில் அள்ளியது போலத் தோன்றலாம்

அள்ள முடியாத காலம் வெளியெங்கும் நிறைந்து கிடக்கிறது

*****