தேடலின் மிச்சம்

தேடலின் மிச்சம்

ஏதோ ஒன்றைத் தேடிக் கொண்டிருக்கிறது

இதுவரை எதுவும் கண்டடைந்ததாக இல்லை

அது எப்போதும் இருக்கப் போவதில்லை

என்பது நிதர்சனம் என்பதற்காக

தேடலை நிறுத்த முடியாது

உயிர் உறங்கும் வரை தேடிக் கொண்டிருப்பதாக

தேடிக் கொண்டிருப்பதின் மர்ம சுகம்

தேடாமலிருக்க விடப் போவதில்லை

இதுவில்லை என்றால் அது

அதுவில்லை என்றால் எது என்று

தேடிக் கொண்டிருப்பதில்

ஏதோ ஒன்று இருப்பதான கானல்

எப்போதும் வழிநடத்திக் கொண்டிருக்கிறது

எப்போதாவது தேடலை நிறுத்தத் தோன்றினால்

எதைத் தேடுகிறேன்

ஏன் தேடுகிறேன்

எதற்குத் தேடுகிறேன்

எப்படித் தேடுகிறேன்

எங்கே தேடுகிறேன் என்று

தேடுவது குறித்துக் கேள்வி கேட்பதை நிறுத்து

தேடலையே கேள்வி கேள்

எரிந்த சாம்பலின் மிச்சம் அங்கிருக்கும்

எடுத்துப் பூசிக் கொண்டு கிளம்பி விடு

*****