பெயர் மாறும் பேருந்து நிறுத்தங்கள்

பெயர் மாறும் பேருந்து நிறுத்தங்கள்

கேணிக்கரையின் பெயர் அழித்து

வாள்பட்டறை ஸ்டாப்பிங்காகி விட்டது

எங்கள் ஊர் பேருந்து நிறுத்தம்

தண்ணீரில் மூழ்கி நீரெடுத்து வந்த குடங்கள்

குப்பையில் மூழ்கி விட்ட கேணியை

வெறுமையாகப் பார்த்துக் கொண்டு

பஞ்சாயத்துப் பைப்பில் நீரெடுத்துச் செல்கின்றன

நல்லதங்காள் இன்றிருந்தால்

பாவம் கேணியில் போடும் குழந்தைகளை

குப்பைத் தொட்டியில் போட்டு விட்டுப் போயிருப்பாள்

கிணறுகள் அற்றுப் போய் விட்ட போதும்

ஆழ்துளைக் கிணற்றில் விழுந்து விட்ட

குழந்தைகளைப் பற்றிய செய்திகள் வரும் போதெல்லாம்

நல்லதங்காள்கள் மீண்டும் மீண்டும் பிறந்து வருகிறார்களோ என்று

அனிச்சையாய் எண்ணத் தோன்றுகிறது

வாள்பட்டறை ஸ்டாப்பிங் என்ற பெயரும்

எத்தனை நாள் நிலைத்து நிற்கப் போகிறது

மரங்கள் அற்றுப் போய் விட்டால்

தண்ணீருக்காக ஆழ்துளைக் கிணறு தோண்டினால்

போர்வெல் ஸ்டாப்பிங் என்ற கூட

பெயர் மாறிப் போகலாம் வருங்காலத்தில்

எங்கள் ஊர் ஸ்டாப்பிங்

*****