வீடு திரும்புதல்

வீடு திரும்புதல்

இந்த நகரை உண்டு செரிப்பது மனதுக்கும்

இந்த நகரில் உண்டு செரிப்பதும் வயிறுக்கும்

கடினமாக இருக்கிறது

நகரத்தில் உழைக்கும் உழைப்பில்தான்

கிராமத்தில் பசியாறுவதாக

அலைபேசியில் பேசும் போதெல்லாம் சொல்கிறார்கள்

அம்மச்சியும் அம்மாவும் இல்லாளும்

பசிக்காக வீட்டுக்கு ஒருவரை விரட்டி விட்டு

நகரங்களைக் கொழுக்கச் செய்கின்றன கிராமங்கள்

நகரங்கள் இல்லாவிட்டால்

சம்பாதிக்க முடியாது என்பவர்களை என்ன சொல்வது

நகரங்களுக்கு யாருமே போகா விட்டால்

யாருக்குச் சம்பாத்தியம் கொடுப்பது

சந்தைகளில் பொருட்களை விற்கலாம்

சந்தைக்குப் பொருட்கள் வரா விட்டால்

சந்தையில் எந்தப் பொருளை விற்பது

நகர்ப்புற போரினை முடித்து விட்டு

பாசறையினின்று வீடு திரும்பும் வீரனைப் போல

ஒருநாள் கிராமம் திரும்புவேன்

காத்திருக்கும் பெண்டுகளுக்காகவும் பிள்ளைகளுக்காவும்

*****