அன்றாடம் தோற்கும் வார்த்தைக் களம்

அன்றாடம் தோற்கும் வார்த்தைக் களம்

அவரவர்க்கான வார்த்தை தேடி அலைகிறது ஆழ்மனம்

ஒருவருக்குப் பிடித்த வார்த்தை

இன்னொருவருக்குப் பிடித்தமானதாக இல்லை

பணிந்து குழையும் வார்த்தைகளை

மேலாளருக்குப் பரிமாறி விட்டு

அதிகாரம் தொனிக்கும் வார்த்தைகளை

சேவகர்கள் மீது வீசியெறிய வேண்டியிருக்கிறது

பிச்சைக்காரர்கள் மீது எறியும் வார்த்தைகள் படுமோசமானவை

பிள்ளைகளுக்குத் தனி வார்த்தைகள்

உறவுகளுக்கு வேறு வார்த்தைகள்

விரோதிகளுக்குக் கடும் வார்த்தைகள்

எதிர்வீட்டுக்காரருக்கு வெறும் வார்த்தைகள்

கூனிக் குறுகி நிற்கும் போது முனகும் வார்த்தைகள்

வசமாய்ச் சிக்கிக் கொள்கையில் மௌனமே வார்த்தைகள்

ஒரு நொடி தனித்திருக்கும் போது

தனக்கு தானே பேசிக் கொள்ளும் புதிர் வார்த்தைகள்

கழிவிரக்கத்தின் கடைமடியில் கிடக்கும் போது

ஆறுதல் தேடி ஏங்கித் தவிக்கும் வார்த்தைகள்

அன்றாட வாழ்க்கை நெரிசலில் சிக்கிப் பிதுங்கி

கனவுகளில் எதிரொலிக்கும் வார்த்தைகள்

தாட்சண்யம் அற்று சில நேரங்களில்

முகபிம்பத்தைச் சிதறடிக்கும் வார்த்தைகள்

அன்றாடம் வார்த்தைகளைத் தேடித் தோற்கிறது

வார்த்தைகளின் விளையாட்டுக் களமாகி விட்ட வாழ்க்கை

*****