பார்த்தலின் சுதந்திரம்

பார்த்தலின் சுதந்திரம்

ஏதும் எதிர்பார்க்கச் சொல்லாதீர்கள்

எப்போது எது நடக்கும் என்று

எதிர்பார்க்க முடியாமல்

எதிர்பார்ப்பின் கரைகளில்

வேடிக்கைப் பார்த்துக் கொண்டிருக்கிறேன்

தயவுசெய்து சொன்னால் நம்புங்கள்

வேடிக்கை பார்ப்பது

எதையும் எதிர்பார்த்தன்று

அது வெறுமனே பார்ப்பது

பார்க்கையில் அபூர்வங்கள் சிக்குவதும்

சிக்காமல் போவதும்

பார்ப்பவரின் கையில் இல்லை

அபூர்வங்களுக்குள் சிக்காமல் இருந்தால்

எல்லாரும் பார்க்கலாம்

பார்த்துக் கொண்டே இருக்கலாம்

ஏமாற்றங்கள் ஏதுமின்றி

வாழ்நாள் முழுவதும் பார்த்துக் கொண்டிருக்கலாம்

எந்த விதச் சலிப்புமின்றி

எப்போதும் பார்த்துக் கொண்டே இருக்கலாம்

அவரவர் பார்ப்பது

அவரவர்களிடம் இருக்கிறது

எப்படி வேண்டுமானாலும் பார்க்கலாம் என்பது

அவரவருக்கான சுதந்திரம்

வெறுமனே பார்ப்பது மட்டுமே

பார்ப்பதில் உள்ள சுதந்திரம்

*****