கைப்பிடியளவு கடுகு வாங்கி வரச் சொன்ன புத்தர்

கைப்பிடியளவு கடுகு வாங்கி வரச் சொன்ன புத்தர்

புத்தர் அப்படிச் சொல்வார் என்று எதிர்பார்க்கவில்லை

குடித்துச் சாகாதவர் வீட்டிலிருந்து

கைப்பிடியளவு கடுகு வாங்கி வரச் சொன்னார்

யார் வீட்டில் குடித்துச் சாகாதவர் இருக்கிறார்

வீட்டுக்கு ஒருவர் குடித்துச் சாகத்தான் இருக்கிறார்

ஒன்றோடு போனதே அதிர்ஷ்டம் என்று

ஆறுதல் சொல்லத்தான் எல்லாரும் இருக்கிறார்

குடியால் சாவது ஒரு நிலத்தின் இயற்கை

குடியால் செத்தவர்களுக்கு

குடித்த படி பாடை கட்டிக் கூத்தாடி

இறுதி நல்லடக்கம் செய்வது ஒரு நிலத்தின் பண்பாடு

குடியால் மாண்டவருக்காகப்

புத்தரிடம் ஆறுதல் தேடுவது அறியாமை என்றான பிறகு   

குடியே சாவிற்குக் காரணம் என்றார் புத்தர்

அன்றைய கடைசிச் சொட்டு மதுவைக் குடித்தபடி

புத்தர் சொல்வதே சரியென்று

பாதம் பணிந்தபடி சென்று கொண்டிருக்கின்றனர் குடி மக்கள்

*****