சம்பந்தப்படாத ரத்தங்கள்

சம்பந்தப்படாத ரத்தங்கள்

சாலையைக் கடக்க

சாலையில் கடக்க

சாலையில் அடிபட

சாலையே அடிபட

எல்லாருக்கும் ஒரு காரணம் இருக்கிறது

ஏதுமறியா நத்தைகளும்

என்னவென்றறியாத ஆமைகளும்

ஏனென்று புரியாத பாம்புகளும்

எதற்கென்று தெரியாத அணில்களும்

எப்படியென்று தெரியாத ஓணான்களும்

சாலையைக் கடக்க

சாலையில் அடிபட

இந்த ஜென்ம காரணம் இல்லையென்றாலும்

பூர்வ ஜென்ம காரணங்கள் இருக்கக் கூடும்

அடிபட்டு மாண்ட பின்னும்

வாகனங்கள் மேல் வாகனங்கள் மேலேறிச் செல்ல

பெரிதாய்க் காரணம் என்ன இருக்க முடியும்

அவரவர் அவசரம் அவரவருக்கு முக்கியம்

நிதானமாய் உட்கார்ந்து அழுவதற்கு

ரத்த சம்பந்தம் ஏதேனும் இருக்க வேண்டும்

அஃதில்லாத போது

பன்றியின் ரத்தமும்

மனிதரின் ரத்தமும் வேறு வேறு

மனிதருக்கே மனிதரின் ரத்தம் வேறு வேறு

*****