அமேசானில் விற்பனைக்கு வரும் குளங்கள்

அமேசானில் விற்பனைக்கு வரும் குளங்கள்

எங்கெங்கு குளம் இருந்தது

ஏரி இருந்தது என்பதை அறிவதற்கு

பெரியதோர் அறிவு உதவாது போகலாம்

பெருங்கட்டடங்கள் இருக்கும் இடமெல்லாம்

குளமிருந்த இடங்களே

பொதுப்பயன்பாட்டுக் கூடங்கள் இருக்கும் இடமெல்லாம்

ஏரி இருந்த இடங்களே

என்று சொல்லும் சின்னதோர் அறிவு மதிப்பின்றிப் போகலாம்

குளமென்ன குளம் என்று

அடுக்குமாடிக் கட்டிடத்தின் மேல்

குளமென்றைக் கட்டி எழுப்பலாம்

ஏரியென்ன பெரிய ஏரி என்று

பெரியதொரு பதாகையில் மழைநீரைச் சேமித்து வைக்கலாம்

அக்குளத்தையும் அவ்வேரியைத் தேடியும்

பறவைகளும் பாக்டீரியங்களும் வந்து சேரலாம்

காவலுக்கு நான்கு காவலர்கள் நிற்குமிடத்தில்

குளத்தில் கல்லெறிந்து மன பாரத்தைப் போக்க வரும்

ஒருவர் ஏமாற்றத்துடன் திரும்பலாம்

அவருக்கென்று ஒரு பொம்மைக் குளமோ

அலைபேசிச் செயலியோ

அமேசானிலோ பிளே ஸ்டோரிலோ விற்பனைக்கு வரலாம்

இல்லாத குளங்களுக்கும் ஏரிகளுக்கும்

வேறென்ன செய்வது

காசு பார்க்கும் பண்டம் செய்வதைத் தவிர

*****