மீளா வினை

மீளா வினை

எல்லாரும் ஒரு நாள் நகரத்திற்குப் போவோம் என எதிர்பார்க்கவில்லை

முதலில் அப்பா போனார்

பிறகு அப்பாவுக்கு உதவியாய் அண்ணன் போனான்

அப்பாவுக்கும் அண்ணனுக்கும் சமைத்துப் போட

அக்கா போனாள்

அப்பாவும் அண்ணனும் இல்லாத நேரங்களில்

அக்காவைப் பார்த்துக் கொள்ள என

அம்மா போனாள்

அம்மாவுக்கும் வேலையென்று ஆன போது

வேலைக்குச் செல்லும் அக்காவுக்குத் துணை செல்ல என

நானும் போனேன்

எல்லோரும் நகரம் வந்தடைந்த முதலாண்டு

கோயில் திருவிழா பொங்கல் தீபாவளி என்று

சிலமுறைகள் கிராமம் போய் வந்தோம்

அடுத்தடுத்த ஆண்டுகளில் பொங்கலும் தீபாவளியையும்

நகரத்தில் கொண்டாடி விட்டு

கோயில் திருவிழாவுக்கென்று ஒரு முறை மட்டும் போய் வந்தோம்

திருவிழாவுக்காக வருடத்திற்கொரு முறை போய் வருவது

சிரமமாய்ப் போக

கோயிலொன்றையும் நகரத்தில் கட்டிக் கொண்டு விட்ட பிறகு

கிராமங்களுக்குத் திரும்ப

அது இன்னொரு நகரமாய் மாறும் காலம் வர வேண்டும்

நாங்கள் இப்போது குடியேறியிருக்கும்

முன்னொரு காலத்தில் கிராமமாய் இருந்த நகரத்தைப் போல

*****