கருணையை வெளிப்படுத்த தொடங்கும் கடவுள்

கருணையை வெளிப்படுத்த தொடங்கும் கடவுள்

நம்பிக்கையோடு வேண்ட செல்லும் இடத்தில்

நம்பிக்கையில்லாமல் பாதணிகளை விட்டுச் செல்ல வேண்டியதாகிறது

நான்கு சுவர்களில் சிறைபட்டு

காலம் முழுவதும் கடவுள்

வேண்டுதல்களைக் கேட்டுக் கொண்டிருக்கிறார்

எத்தனை வேண்டுதல்களை நிறைவேற்றியிருப்பீர்

என்ற கேள்விக்கு எந்தவித சலனமில்லாமல்

பதிலை வெறுத்தவர் போல அமர்ந்திருக்கும் கடவுளிடம்

அதற்கு மேல் கேட்க என்ன இருக்கிறது என்று

வேண்டுதல்களை அப்படியே விட்டு வெளியேறுகிறேன்

அதுவரை வெளியில் கிடந்த

பாதணிகளைப் பாதுகாத்து வைத்திருந்த கடவுளுக்கு

கண்ணீர் மல்க நன்றி செலுத்துகிறேன்

அதனையடுத்து அதற்கு மேல்

பாதணிகளைத் திருட முடியாத விரக்தியில்

தன்னைச் சபித்து விட்டுப் போகும்

ஒரு திருடரின் மேல் தன் கருணையை

வெளிப்படுத்தத் தொடங்கியிருக்க வேண்டும் கடவுள்

*****