நாம் நாறி விடக் கூடாது

நாம் நாறி விடக் கூடாது

அவர்வர் சளியை

சொற்களில் துப்பி வைக்கிறோம்

அவரவர்க்கு அமுதமாக இருக்கும் எச்சில்

மற்றவர்களுக்கு அசூயையாக

தெருவெங்கும் காறித் துப்பப்பட்டுக் கிடக்கிறது

எப்போதோ சிந்தப்பட்டு உறைந்து போன

குருதியின் சொல் கழுவப்படாமல்

சுவரெங்கும் புரையோடிக் கிடக்கிறது

வஞ்சகத்தைக் குழைத்து வாலாட்டிய சொல்

கடித்துக் குதறி விட்டுப் போன சம்பவம்

ரகசிய கேமராக்களில் பதிவாகி

நாள்பட்டுப் போனதில் அழிந்து போயிருக்கிறது

மௌனத்தை மலரச் செய்து சங்கடப்படுத்தாமல்

சொற்களை உதிர்த்துத் துயரப்படுத்தியதற்காக

உங்களிடம் மன்னிப்பைக் கோருகிறேன்

சொற்களைப் பெருக்கித் தூய்மை செய்வதற்கான

துப்புரவாளர் வரும் நேரம் நெருங்கி விட்டது

குப்பைகளை உங்களிடம் வைத்துக் கொண்டு

அல்லதை வீசி எறிந்து விடாதீர்கள்

குப்பை மேடுகள் மணம் வீசுவது முக்கியமல்ல

நாம் நாறிக் கொண்டிருக்கக் கூடாது

*****