சுடலையில் தணிக்கும் தீ

சுடலையில் தணிக்கும் தீ

நெருப்புக்கு இடம் கொடுத்த விறகு

கரியாகி வருத்தப் பட்டது

நெருப்புக்கு இடம் கொடுத்த கரி

நெருப்பாகிக் கரியாகி நெருப்பாகி கரியாகிப் போனது

எரிந்த பின் எல்லாம்

சாம்பலின் மிச்சம்

சாம்பலுக்கும் பேதமுண்டு

அஸ்தி என்றும் பஸ்பம் என்றும்

தினம் தினம் எரிந்து அடங்கும்

அடுப்பும் வயிறும்

வாழ்க்கை பெற்றெடுத்த தீயின் சாட்சிகள்

தினம் எரிந்து தினம் அடங்கும் சூரியன்

நாள் கணக்கைச் சொல்லிப் போகிறது

எரிய எரிய இயங்கியபடி

பயணக் கணக்குக் காட்டுகிறது வாகனம்

நெருப்பாற்றில் நீந்தி வந்தவர்கள் குறித்து

ஒலிப்பெருக்கிகள் முழங்குகின்றன

உயிர்ப்புக்கும் நெருப்புக்கும்

உயிர்ப்பான தொடர்பு இருக்கிறது

சுடலையில் தணிக்கும் தீ வந்து எரிக்கும் வரை

*****