சுமந்தலையும் வாழ்க்கை

சுமந்தலையும் வாழ்க்கை

கசியும் வியர்வையில்

சூரிய ஒளியின் பளபளப்பு பிரதிபலிக்கிறது

வியர்வை அரும்பாத நதிகள்

வேர்க்குரு மேனியைப் போன்ற

மணல் வெளிகளால் நிரம்பிக் கிடக்கிறது

வெம்மை பொறுக்காத மரங்கள்

ஆடைகளை விசிறி எறிந்து விட்டதைப் போல

நிர்வாண கோலங்களில் நிற்கின்றன

எந்தக் கோடைக்கும் வற்றாத

சாக்கடைப் பெருக்குப் பாதாளத்தில் ஓடிக் கொண்டிருக்கிறது

குறைந்தபாடில்லாத கொசுக்கள்

பகலுக்கும் இரவுக்கும் பேதமில்லாமல்

தெருநாய்களைப் போலக் கடித்துக் குதறுகின்றன

மழையைப் போல அறைகளில் அடைத்து விடாத

வெம்மையைச் சுமந்தலையும் வெயில்

எங்கு வேண்டுமானாலும் சென்று வர அனுமதிக்கிறது

என் வீட்டுக் குளிர்சாதனப் பெட்டியில்

இரண்டு புட்டி குளிர்பானம்

வெந்து தணிந்த சூட்டை ஆற்றுவிக்க

எப்போதும் குளிர் நிலையில் காத்திருக்கிறது

கொளுத்தும் கோடைக்கு

அக்கினிக் குஞ்சுகளைப் பெற்றுக் கொடுத்ததில்

குளிர் பதன அறைகளுக்குக்

கொஞ்சம் பங்கு இருக்கக் கூடும் என்றாலும்

எது குறித்தும் அலட்டிக் கொள்ளலாம்

அது எப்போதும் குளிர்வாயிருக்கிறது

வருவதை வரும் போது பார்த்துக் கொள்ளலாம் என்ற வேட்கையோடு

உள்ளே குளுமையையும் வெளியே வெம்மையையும்

சுமந்தலையும் வாழ்க்கை சுழன்று கொண்டிருக்கிறது

*****