உன் மன எரிச்சலிலிருந்து கொஞ்சம் விடுதலை கொடு

உன் மன எரிச்சலிலிருந்து கொஞ்சம் விடுதலை கொடு

நீ என்னதான் எதிர்பார்க்கிறாய்

உண்மையினின்று வீசி எறிந்து விட்ட

சாகசப் பொய்கள் நிரம்பிய வாக்குறுதிகளை

அல்லது

பார்வையிழந்து விட்ட

உன்மத்தம் நிரம்பிய உன் சொற்களின்

முன்பிலான அடிபணிவை

உன்னால் ஏற்க முடியாதவைப் போல

என்னாலும் ஏற்க முடியாத

ஒரு சில இந்த உலகில் இருக்கின்றன

ஏற்க முடியாத சிலந்திகளை

ஒழித்துக் கட்டும் ரசாயனத்தை

உன் உதடெங்கும் பூசி வைத்திருக்கிறாய்

நீ அன்பாகத்தான் முத்தமிடுகிறாய் என்றாலும்

உன் உதட்டின் ரசாயனம்

என் கன்னத்தை அரித்தெடுக்கிறது

அரிப்பைப் போக்கிக் கொள்ள

கன்னத்தைத் தடவிப் பார்க்கையில்

நான் உன்னை அவமதித்து விட்டதாக

ஊரெங்கும் புலம்பித் திரிகிறாய்

உன் மன எரிச்சல் என் உடல் எரிச்சல்

நியாயத் தராசின் முள்

இப்படியும் அப்படியுமாக அலைவுறுவதில்

என் உடல் எரிச்சலை விட

உன் மன எரிச்சல் பெரிதாக இருந்து விட்டுப் போகட்டும்

என் உடல் எரிச்சலைப் போக்கிக் கொள்ள

உன் மன எரிச்சலிலிருந்து கொஞ்சம் விடுதலை கொடு

*****