ஒரு கடவுள் செய்வது

ஒரு கடவுள் செய்வது

நான் அந்தத் தவறைச் செய்தேன்

மீண்டும் மீண்டும் செய்தேன்

திரும்ப திரும்ப உனக்கே செய்தேன்

ஒவ்வொரு முறை செய்யும் போது

கடவுள் உன்னைக் காப்பாராக என்றாய்

நான் செய்வதற்கு உன் கடவுள்

என்னைத் தண்டிக்க வேண்டும் என்று கத்தினேன்

அப்போதும் கடவுள் எப்போதும் உன்னைக் காப்பார் என்றாய்

உன்னைக் காத்து என்னைத் தண்டிக்காத

கடவுளென்ன கடவுள் என்று உன்னை நிந்தித்தேன்

தண்டிப்பவர் கடவுள் இல்லை என்றாய்

உன்னைக் காப்பவரும் கடவுள் இல்லையோ என்றதற்கும்

ஆம் என்றாய்

வேறெதற்குதான் உன் கடவுள் என்ற போது

கருணையோடு இருப்பதற்கு மட்டும் கடவுள் என்றாய்

என் கடவுளே என்னை மன்னித்து விடுங்கள் என்று

உன்னைப் பார்த்து இறைஞ்ச தொடங்குகிறேன்

கருணையோடு ஒரு பார்வையில் கடந்து போகிறாய் நீ

*****