என்னைச் சரி செய்து கொள்ளுதல்

என்னைச் சரி செய்து கொள்ளுதல்

நான் என் எண்ணங்களைச் சரி செய்து கொள்கிறேன்

நேரில் நேசம் பொங்க பேசியவரை

கனவில் கொலை செய்கின்றன எண்ணங்கள்

நிஜத்தில் வம்பிழுத்தவரை

என்றோ ஒரு நாள் கனவில் ஆரத் தழுவிக் கொள்ளத்தான் போகிறேன்

இப்படியும் அப்படியுமாகக் குதியாட்டம் போடும் எண்ணங்களுக்காக

உன்னை நிந்திக்கப் போவதில்லை

உன்னோடு சண்டை போடப் போவதில்லை

எண்ணங்கள் அடங்கிப் போனால்

எல்லாம் அமைதியாகும் என்பது தெரிகிறது

எண்ணங்கள் தவறாகும் போது மட்டும் எச்சரிக்கையாகிறேன்

என் முன் துரோகிகள் வந்து நின்று விடக் கூடாது

என் துரோகிகளே என்னிடமிருந்து எடுத்துச் செல்ல

என் அன்பைத் தவிர என்னிடம் வேறு ஏதுமில்லை

உங்களைத் தண்டித்துக் கனவிலும் விரோதியாகி விடக் கூடாது என்று

ஒவ்வொரு முறையும் பிரார்த்திக் கொள்கிறேன்

*****