அன்பின் ஒலிப்பு

அன்பின் ஒலிப்பு

ஒவ்வொரு முறையும் சண்டை போடுவதற்காக

நாம் பேசிக் கொண்டிருக்கிறோம்

அன்பாகத் துவங்கி உக்கிரமா உரையாடுவது

நமக்குப் பழக்கமாகி விட்டது

நாம் சந்தித்துக் கொண்டால்

பரபரப்புக்குப் பஞ்சமிருக்காது என்று

உலகம் பேசத் தொடங்கி விட்டது

ஏதோ ஒன்று உன்னிடமோ அல்லது என்னிடமோ

மாறியாக வேண்டும் என்று தோன்றுகிறது

இந்த முறை சந்தித்த போது

நீ நிறைய பேசிக் கொண்டே போன போது

நான் எதுவும் பேசாது இருந்தேன்

என்ன பேசுவதென்று தெரியாமல் தடுமாறிய போது

என்னிடம் ஒரு புன்னகை மட்டும் பாக்கியிருந்தது

அதற்கு மேல் என்ன பேசுவதென்று தெரியாது

என்னை மிகவும் பிடித்திருப்பதாய்ச் சொன்னாய்

வார்த்தைகள் வற்றிப் போகுமிடத்தில்

அன்பு ஊற்றெடுக்கும் என்று

அசரீரி ஒலிக்கத் தொடங்கியது அப்போது

*****