நன்றி செலுத்தவே வாழ்கிறேன்

நன்றி செலுத்தவே வாழ்கிறேன்

உனக்கு நன்றி செலுத்தவே வந்திருக்கிறேன்

நீ என்னை கொலை செய்ய முயன்றவன் என்றார்கள்

அதனாலென்ன உனக்கு நன்றி சொல்லக் கூடாதா

நன்மைக்குச் சொல்வதுதான் நன்றி என்று என்னை மறித்துப் பார்த்தார்கள்

அதனாலேன்ன தீமைக்கும் நன்றி சொல்லக் கூடாதா

என் நன்றி ஏற்கப்படாது என்றார்கள்

அதனாலென்ன நீயென் நன்றியைத் தூக்கி எறிந்து விடவா போகிறாய்

அப்படித்தான் ஆகும் என்றார்கள்

அதனாலென்ன அப்படியே ஆகட்டும்

ஒரு நன்றியை ஏன் விரயமாக்க வேண்டும் என்றார்கள்

அதனாலென்ன கொடுக்க கொடுக்க குறைவதா நன்றிகள்

என்றாலும் அது எப்படி முறையாகும் என்றார்கள்

அதனாலென்ன நன்றியென்ன கோபித்துக் கொள்ளவா போகிறது

இருந்தாலும் நன்றி சொல்வதற்கு முன் கொஞ்சம் யோசியுங்கள் என்றார்கள்

அதனாலென்ன எதற்கும் சொல்லப்படுவதுதான் நன்றி போய் வாருங்கள்

*****